Gəncə şahmatçıları Beynəlxalq Şahmat Festivalında iştirak ediblər. Bu haqda 7 may tarixində Gəncə Şahmat Məktəbinə istinadən xəbər veririk.
Çexiya Respublikasının Ostrava şəhərində A,B və C qrupları üzrə Beynəlxalq Şahmat Festivalı baş tutub. 15 ölkədən 341 şahmatçının iştirak etdiyi (92+136+113) İsveçrə sistemi ilə olan “Ostravsky Konik 2024” festivalına gənc şahmatçılarımız da qatılıblar. Onlar “Təhsil Respublika İdman Mərkəzi” publik hüquqi şəxsinin 2 nömrəli Uşaq-Gənclər İdman-Şahmat məktəbi publik hüquqi şəxsin yetirmələridir.
Yarışda 9 oyundan 7.5 xal toplayan B qrupundan Hüseyn Qurbanov və C qrupundan Amin Nəsibli II yerə (əlavə göstəricilərə görə) layiq görülüblər. Şahmatçılarımız yüksək nəticələrinə görə kubok və pul mükafatı ilə təltif olunublar və hər bir təmsilçimiz beynəlxalq reytinqini nəzərəçarpacaq dərəcədə yüksəldib.
Festival ərəfəsində keçirilən blits (sürətli) turnirdə məktəbimizin yetirməsi və gənc məşqçi-müəllim Babək Cəfərli 114 iştirakçı arasında bütün rəqiblərindən üstün olaraq turnirin qalibi olub. Vahid Bəşirli və Hüseyn Qurbanov da blits turnirin mükafatçıları sırasında olaraq pul mükafatı qazanıblar.
