Qədim Gəncə ölkəmizin mədəniyyətinə, tarixinə və ədəbiyyatına böyük töhfələr verən görkəmli şəxsiyyətlər yetişdirib. Hal-hazırda da bu proses davam edir. Gencexeber.az redaksiyası olaraq, yurdumuzun gənc və istedadlı aktyorları haqda məlumat toplayıb, oxucularımızla paylaşırıq.
Şahmar Məmmədov Azərbaycan Dövlət Mədəniyyət və İncəsənət Universitetində “Rejissor sənəti” ixtisasını bitirib. "Yuxu kimi" serialından Elnur kimi tanıdığımız aktyor, həmin ekran əsərində rejissor assistenti kimi də çalışıb. Tələbə vaxtı Akademik Milli Dram Teatrında aktyorluq, rejissorluq və səhnə plastikası dərsləri alıb.
Qeyd edək ki, o həm Vətən müharibəsi, həm də Aprel döyüşlərində iştirak edib. Prezident tərəfindən Cəbrayılın, Qubadlının və Laçının azad olunmasına görə medallarla təltif olunub.
“Cəbhədə gördüklərim, müharibədə yaşadıqlarım haqqında gələcəkdə bir ssenari yazmaq istəyirəm”, - deyə Şahmar bildirib.
Murad Ruzigar (Meyfaliyev) 5 may 1995-ci ildə anadan olub. 2012-ci ildən Gəncə Dövlət Dram Teatrında çalışır. O, “Dəli Kür” filmində Cahandar Ağa obrazını canlandıran Ələddin Abbasovun qohumudur.
Ruslan Hüseynov Azərbaycan Dövlət Mədəniyyət və İncəsənət Universitetində oxuyub. Tələbə vaxtı Dövlət “Yuğ” Teatrında aktyor sənəti dərsini alıb. Burada “Dolu” filminin “komandir”i Xalq artisti Məmmədsəfa Qasımovun kursunu bitirib. 29 yaşlı aktyor 2017-ci ildən Gəncə Dövlət Dram Teatrında çalışır. İzləyicilər onu “Yuxu” serialından “Malik” obrazi ilə tanıyırlar.
