Gəncədə şagird repetitor dəstəyi olmadan yüksək nəticə əldə edib. Bu haqda 22 aprel tarixində Kəpəz televiziyasına istinadən məlumat veririk.
Bir neçə gün öncə martın 17-də buraxılış imtahanı verən 9-cu sinif şagirdlərinin nəticələri açıqlanıb. Burada respublika üzrə 6 nəfər maksimal - 300 bal nəticə göstərib. Onların arasında Fizika-riyaziyyat və informatika təmayüllü liseyin şagirdi Emil Əliyev də yer alıb.
Məktəblinin nənəsi bildirib ki, o, heç bir repetitor yanına getməyib. Emilin ən böyük arzusu gələcəkdə İKT üzrə mütəxəssis olmaqdır.
“Nənəmdən eşitdim ki, ballar çıxıb. Mən də 77-27 nömrəsinə SMS göndərdim və balım çıxdı. Bir anlıq çox sevindim. Daha sonra sevincimi nənəmlə bölüşdüm. Gələcəkdə arzum odur ki, Amerikada Massaçusets Texnologiya Universitetində (Massachusetts Institute of Technology) təhsil alım. Bunun üçün də gecə-gündüz çalışıram. Məqsədim də orada təhsil alıb, geri qayıdıb, Vətənim üçün layiqli vətəndaş olmaqdır”, - deyə Emil bildirib.
Qeyd edək ki, şagird indiyə kimi respublika fənn olimpiadalarında, fənn müsabiqələrində riyaziyyat və kimya fənləri üzrə də uğurlar əldə edib.
