Gəncə şəhərində təhsil alan şagird yay məktəbinə qatılıb. Bu haqda 23 iyul tarixində Regional Təhsil İdarəsinə istinadən xəbər veririk.
Söhbət 44 nömrəli məktəb-liseyin 9-cu sinif şagirdi Nihat Sadıqovdan gedir. Məktəbli Birləşmiş Krallığın paytaxtı Londonda keçirilən ikinci "YAŞAT" yay məktəbində iştirak edir. 14 gün davam edən “YAŞAT” yay məktəbinin əsas məqsədi şəhid övladlarının dünyagörüşünü, dil biliklərini və bacarıqlarını artırmaq, mədəniyyət mübadiləsində aktiv iştiraklarını təmin etmək, vaxtlarını səmərəli keçirmələrinə, yeni tanışlıqlar və dostluqlar əldə etmələrinə dəstək olmaqdır.
Qeyd edək ki, 13-27 iyul tarixini əhatə edən yay məktəbi London Universitet Kollecində (University College London – UCL) keçirilir. Proqram müddətində iştirakçılar gündəlik 3 saatlıq ingilis dili dərslərində, şəhər ekskursiyasında, tarixi abidələr və muzey gəzintilərində iştirak edəcəklər. İştirakçılar ölkəmizdə 9-cu sinif üzrə buraxılış imtahanında ən uğurlu nəticə əldə etmiş 12 nəfəri əhatə edir.
