Gəncəli idmançı beynəlxalq yarışda qalib olub. Bu haqda 10 iyul tarixində Kəpəz televiziyasına istinadən məlumat veririk.
Koreyanın Çxunçxon şəhərində açıq beynəlxalq turnir keçirilib. Burada qüvvəsini sınayanlar arasında paralimpiyaçımız İmaməddin Xəlilov da yer alıb. O, 70 kiloqram çəki dərəcəsində mübarizə aparıb. Ümumilikdə 4 görüşə çıxmalı olan idmançı 1 Qazaxıstan və 2 Özbəkistan təmsilçisini məğlub edərək finala yüksəlib. Lakin həlledici görüşdə meksikalı rəqibi zədələndiyi üçün mübarizəsiz yarışın qalibi adını qazanıb.
Qeyd edək ki, İmaməddin Xəlilov paralimpiadaya lisenziya qazandıqdan sonra 2-ci dəfə çempionluğu yaşayıb. Ötən ayın sonunda Qubada olimpiadaya hazırlaşan idmançımız hazırda Koreyada beynəlxalq təlim-məşq toplanışındadır. O, təxminən 10 gün sonra Vətənə dönəcək və Paris 2024 öncəsi son məşqlərini yenidən Qubada keçəcək.
