Xorvatiyanın paytaxtı Zaqrebdə keçirilən güləş üzrə dünya çempionatında Azərbaycan idmançısı Nürəddin Novruzov tarixə düşəcək uğura imza atıb.
Gencexeber.az-ın məlumatına əsasən, sərbəst güləş üzrə 61 kq çəki dərəcəsində mübarizə aparan Novruzov rəqiblərini məğlub edərək bürünc medal qazanıb. O, dünya çempionatının mükafatçıları sırasına daxil olub. Bu nəticə ilə o, Azərbaycanın sərbəst güləş tarixində son 6 ilin susqunluğunu pozub.
Sonuncu dəfə böyüklər arasında sərbəst güləş üzrə dünya çempionatında medal qazanan azərbaycanlı idmançı Cəbrayıl Həsənov olub. 2019-cu ildən bəri bu kateqoriyada yalnız legioner güləşçilər nəticə göstərə bilirdi, lakin yerli idmançılarımız medaldan uzaq qalırdı. Nürəddin Novruzovun bu uğuru həmin durumu dəyişdi və yerli sərbəst güləş məktəbinin gücünü yenidən ortaya qoydu.
Qeyd edək ki, Nürəddin Novruzov 2003-cü il noyabrın 18-də Gəncə şəhərində anadan olub. 2013-cü ildən güləşlə məşğuldur. Tanınmış məşqçi Adil İbrahimovun rəhbərliyi altında "Neftçi" İdman Klubunda çıxış edir. Təhsilini Kiyev Əmək və Sosial Münasibətlər Akademiyasında alıb.
Bu uğur, yalnız Novruzovun deyil, həm də Azərbaycan güləşinin və Gəncə idman məktəbinin böyük nailiyyəti kimi dəyərləndirilir. 6 illik həsrətdən sonra yerli sərbəst güləşçimizin medal qazanması ölkədə böyük sevinclə qarşılanıb.
