Gəncə şəhər İdman Liseyinin yetirməsi çimərlik güləşi üzrə Azərbaycan çempionatında uğurlu nəticə əldə edib.
Gencexeber.az-ın məlumatına görə, Çimərlik Arenasında start götürən yarışın ilk günündə 2009-2010-cu il təvəllüdlü yeniyetmələr 4 çəki dərəcəsində qüvvələrini sınayıb. Ümumilikdə 71 güləşçinin qatıldığı turnirdə Gəncə təmsilçisi Tunar Quliyev 70 kiloqram çəki dərəcəsində bürünc medal qazanıb. Gənc idmançı yarışda məşqçi Vüsal Qarayevin rəhbərliyi altında çıxış edib.
Fəxri kürsüyə qalxan Tunara Gənclər və İdman Nazirliyinin medalı və diplomu təqdim olunub.
O, çimərlik güləşi üzrə milli komandanın heyətinə cəlb ediləcək və gələn il Seneqalın Dakar şəhərində təşkil olunacaq Yeniyetmələrin Yay Olimpiya Oyunlarına hazırlıq prosesində iştirak edəcək.
