Gəncəli şahmatçı Beynəlxalq titula sahib olub.
Gencexeber.az-ın məlumatına görə, gəncəli şahmat müəllimi Anar Məmmədov Beynəlxalq Şahmat Federasiyası (FIDE) tərəfindən "Arena Grand Master" (AGM) tituluna layiq görülüb.
Bu titul "FIDE Online Arena" sistemində verilən ən yüksək beynəlxalq qrossmeyster dərəcəsidir. 11 illik təcrübəyə malik olan Anar Məmmədov bu nailiyyətlə Gəncə şəhərindən adıçəkilən titulu qazanan ilk şahmatçı olub.
O, əldə etdiyi uğurla bağlı açıqlamasında bildirib:
"Bu titulun gənc şahmatçılar üçün böyük motivasiya olacağına və Gəncənin şahmat tarixində yeni bir səhifə açacağına inanıram."
Qeyd edək ki, Azərbaycanda "Arena Grand Master" tituluna daha əvvəl yalnız Naxçıvandan Tural Zeynalov layiq görülüb.
Məlumat üçün bildirək ki, Anar Füzuli oğlu Məmmədov 1990-cı ildə Gəncə şəhərində anadan olub. Şahmata 10 yaşında Gəncə Şahmat Məktəbində əməkdar məşqçi Əşrəf Mehdiyevin rəhbərliyi altında başlayıb. Uşaqlıq illərindən bir çox yerli turnirlərin qalibi və mükafatçısı olub, 13 yaşında idman ustalığına namizəd normasını yerinə yetirib.
Azərbaycan Dövlət Aqrar Universitetində magistr təhsilini fərqlənmə diplomu ilə başa vurub. 2015-ci ildən Bakı şəhəri 4 nömrəli Uşaq-Gənclər İdman Şahmat Məktəbində və hazırda Heydər Əliyev adına Müasir Təhsil Kompleksində şahmat müəllimi kimi fəaliyyət göstərir.
Onun yetirmələri arasında beynəlxalq reytinqli şahmatçılar və Lüksemburq milli komandasının üzvü Mikayıl Heydərov da var.
