Xəbər verdiyimiz kimi, Gəncə Dövlət Universitetinin (GDU) tələbəsi Vasif Bağırov beynəlxalq arenada böyük uğura imza atıb.
Gencexeber.az xəbər verir ki, 4-5 iyul 2025-ci il tarixlərində İtaliyanın Kaorle şəhərində keçirilən sərbəst güləş üzrə “U20 Avropa çempionatı”nda GDU-nun Fiziki tərbiyə və çağırışaqədərki hazırlıq müəllimliyi ixtisasının III kurs tələbəsi Vasif Bağırov bütün rəqiblərini məğlub edərək Avropa çempionu adına layiq görülüb. O, finala gedən yolda Türkiyə, Macarıstan, Moldova və Gürcüstan idmançılarına qalib gəlib və yarışın qızıl medalını qazanıb.
Gəncə Dövlət Universitetinin rektoru Yusif Yusibov gənc idmançı ilə görüş keçirib. Rektor tələbəni təbrik edərək ona gələcək karyerasında uğurlar arzulayıb, eyni zamanda, beynəlxalq yarışda Azərbaycanın adını uca tutduğu üçün təşəkkürünü bildirib.
Görüşdə çıxış edən Pedaqoji fakültənin dekanı Zaur Hüseynov və universitetin İdman Klubunun rəhbəri Xəqani Umudov Vasif Bağırovun digər uğurlarını da xatırladıblar. Bildirilib ki, o, “U17 Avropa çempionatı–2022” və “U17 Dünya çempionatı–2022” yarışlarında qızıl, “U20 Avropa çempionatı–2024”də isə gümüş medal qazanıb.
Çempion tələbə çıxışında göstərilən dəstəyə görə universitet rəhbərliyinə təşəkkür edib və uğurlarını davam etdirmək niyyətində olduğunu bildirib.
