Adil Çərkəz oğlu Azayev 12 fevral 1957-ci ildə Gəncə şəhərində anadan olub. Rəssam Adil Azay kimi tanınıb.
O, 1972-1976-cı illərdə Rostov-na-Donu şəhərində Kino və Televiziya Texnikumunda, 1984-1989-cu illərdə isə Azərbaycan Dövlət İncəsənət İnstitutunun rəssamlıq fakültəsində təhsil alıb.
Adil Azay 1978-ci ildən “Azərbaycanfilm” kinostudiyasında işləyib. O, 30-dan çox filmdə quruluşçu rəssam kimi çalışıb. Ekran əsərləri yerli və beynəlxalq kino festivallarında uğurla nümayiş olunub. Onların sırasında “Ömürdən uzun gecə”, “Yaz yuxusunun işığı”, “Qobustan”, “Vahimə”, “Qız qalası”, “Yuxu” , “Odla qol-boyun”, “Arxada qalmış gələcək” və başqa qısa və tammetrajlı filmlərin adlarını çəkmək olar. Həmçinin ABŞ istehsalı olan “Pain” (“Ağrı”, 2000 il) filmində rəssam kimi çalışıb. Bundan əlavə, Azay “Sufi ocaqları, “Yun hörgüsü”, “Vulkanın nəfəsi”, “Daşın yaddaşı” kimi qısametrajlı filmlərin rejissoru olub.
2019-cu ildə Adil Azay Azərbaycan kinematoqrafiyasının inkişafında xidmətlərinə görə, “Azərbaycanın Əməkdar incəsənət xadimi” fəxri adına layiq görülüb.
Rəssam hazırda Azərbaycan Dövlət Mədəniyyət və İncəsənət Universitetində pedaqoji fəaliyyətlə də məşğuldur.
Mənbələr:
