Bu gün, oktyabrın 21-də, Azərbaycanın xalq artisti Tünzalə Ağayevanın 49 yaşı tamam olub.
Gencexeber.az məlumat verir ki, əslən Azərbaycanın qərb bölgəsi Tovuz şəhərindən olan məşhur müğənni və bəstəkar bununla bağlı sosial şəbəkə hesabında paylaşım edib: “49 yaşım, xoş gəldin. Yaşadığım hər ilə görə Rəbbimə Sonsuz Şükürlər Olsun”.
Qeyd edək ki, Tünzalə Ağayeva 1975-ci ilin oktyabrın 21-də dünyaya göz açıb. Müğənni musiqi səyahətinə doğma şəhərində başlayıb. Sənətkar Tovuzda musiqi məktəbinin piano sinfini bitirib, daha sonra təhsilini Gəncə şəhərində Qəmbər Hüseynli adına musiqi texnikumunun fortepiano sinfində davam etdirib. T.Ağayeva həm də Üzeyir Hacıbəyov adına Bakı Musiqi Akademiyasında bəstəkarlıq dərsləri alıb.
O, hələ 12 yaşındaykən Səməd Vurğunun sözlərinə “Sən o deyilsən” adlı ilk mahnısını bəstələyib. Daha sonra bu mahnı onun ilk albomuna daxil edilib.
Tünzalə Ağayeva Azərbaycan Respublikası Prezidenti İlham Əliyevin 16 may 2006-cı il tarixli Sərəncamı ilə "Əməkdar artist" fəxri adına, 21 oktyabr 2019-cu ildə isə Azərbaycanın xalq artisti fəxri adına layiq görülüb.
Müğənni bu gün də doğma diyarının musiqi mədəniyyətinin görkəmli nümayəndəsi olaraq pərəstişkarlarını yeni əsərləri və ifaları ilə sevindirməkdə davam edir.
[caption id="attachment_67914" align="alignnone" width="696"]
[/caption]
[caption id="attachment_67912" align="alignnone" width="696"]
[/caption]
