Tovuzda təhlükə yaradan məntəqə aşkarlanıb.
Gencexeber.az Fövqəladə Hallar Nazirliyinə istinadən məlumat verir ki, Dağ-Mədən Nəzarəti Dövlət Agentliyinin əməkdaşları tərəfindən Tovuz rayonunda monitorinqlər keçirilib.
Tədbirlər çərçivəsində Əyyublu kəndi ərazisində fəaliyyət göstərən fərdi sahibkar Əkbər Məhərrəm oğlu Niyazova məxsus maye qazdoldurma məntəqəsində plan üzrə yoxlama aparılıb. Nəticədə məntəqədə insan həyatı və sağlamlığı üçün təhlükə yarada biləcək pozuntular aşkarlanıb.
Sözügedən məntəqədə istismar olunan 2 ədəd təzyiq altında işləyən tutumun istismar müddətinin bitdiyi, tam texniki müayinələrin aparılmadığı, nəzarət-ölçü cihazları və qoruyucu qurğuların yoxlanılmadığı müəyyən edilib.
Aşkar olunmuş pozuntuların dərhal aradan qaldırılmasının mümkün olmadığı, insan həyatı və sağlamlığı üçün yaratdığı təhlükə nəzərə alınaraq, məntəqənin istismarı Agentliyin əməkdaşları tərəfindən dayandırılıb. Pozuntuların aradan qaldırılması üçün akt və qərar tərtib edilib.
