Samuxda şəhidlərin xatirəsi anılıb.
Gencexeber.az Samux Rayon İcra Hakimiyyətinə istinadən məlumat verir ki, Şəhidlər Kompleksinin önündə Anım Gününə həsr olunmuş ümumrayon tədbiri keçirilib. Burada icra başçısı Firdovsi Əliyev, şəhid ailələri, qazilər, müharibə iştirakçıları və rayon ictimaiyyətinin nümayəndələri iştirak ediblər.
Saat 12:00-da Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş bütün şəhidlərimizin xatirəsi bir dəqiqəlik sükutla yad edilib, rayon ərazisində nəqliyyat vasitələrinin və piyadaların hərəkəti dayandırılıb və səs siqnalları verilib.
Daha sonra açıq səma altında məktəblilərin rəsm sərgisi keçirilib. Tədbir 44 günlük Vətən müharibəsi şəhidlərinin xatirəsinin əbədiləşdirilməsi və gənclərin vətənpərvərlik ruhunun yüksəldilməsi məqsədi ilə təşkil olunub. Burada məktəblilər xalqımızın düşmən üzərində qələbəsini əks etdirən rəsmlərlə iştirak ediblər.
Tədbirin sonunda Vətən müharibəsində həlak olan şəhidlərin xatirəsinin əbədiləşdirilməsi məqsədi ilə ağacəkmə aksiyası keçirilib. Rayonun Ziyadlı kəndində Kür çayına gedən yolun ətrafına 1000 ədədə yaxın şam ağacı əkilib.
