Gədəbəydə yeniyetmə oğlan və qızlar arasında taekvondo üzrə açıq region birinciliyi keçirilib.
Gencexeber.az Qazax-Tovuz Regional Gənclər və İdman İdarəsinə istinadən məlumat verir ki, Gədəbəy İdman Klubunun zalında olan yarışın açılış mərasimində Regional Gənclər və İdman İdarəsinin İdman sektorunun müdiri Röyal İsmayılov, Uşaq-Gənclər İdman-Şahmat Məktəbinin və Gədəbəy İdman Klubunun direktoru Beyrək Bağırov, “Qarabağ Əlillərinə Qayğı” İctimai Birliyinin Gədəbəy rayon filialının üzvü qazi Altan Sadıqov çıxış ediblər.
Yarışda Gədəbəy rayonunun idmançıları ilə yanaşı Şəmkir, Göygöl, Ağdaş, Ağsu rayonu və Gəncə şəhərinin idmançıları da iştirak edib. Burada ümumilikdə 58 idmançı birincilik uğrunda mübarizə aparıb. Gərgin və maraqlı idman mübarizəsi şəraitində keçən yarışda birinci, ikinci və üçüncü yerləri tutmuş idmançılar diplom, medal və kubokla təltif olunublar.
