Xəbər verdiyimiz kimi, Gəncə şəhər İcra Hakimiyyəti yanında Mənzil Kommunal Təsərrüfatı İstehsalat Birliyinin (MKTİB) bir qrup əməkdaşı 3 aydan artıqdır əmək haqqı ala bilmədiklərini bildiriblər.
Gencexeber.az bildirir ki, MKTİB sözügedən məlumatı təkzib edən açıqlama yayıb.
Açıqlamada qeyd olunub ki, Yaşıllaşdırma şöbəsinin 10 əməkdaşının 3 aydır ki, əmək haqqı almadan işləməsi və ya şəhər tədbirlərində, ağacəkmə aksiyalarında iştirak edib, rəhbərliyin verdiyi tapşırıqları yerinə yetirməsi məsələsi tamamilə əsassızdır:
“Belə ki, Gəncə şəhər Mənzil Kommunal Təsərrüfatı İstehsalat Birliyinin Yaşıllaşdırma şöbəsində idarəetməni optimallaşdırmaq və şəffaflığı təmin etmək məqsədilə bir neçə əməkdaşla, əmək müqaviləsinə xitam verilib. Həmin şəxslərə qanunvericiliyin tələblərinə uyğun olaraq MKTİB tərəfindən müvafiq ödənişlər edilib. Hazırda Gəncə şəhər MKTİB-də tək Yaşıllaşdırma şöbəsində deyil, digər şöbələrdə də qeyd etdiyimiz kimi, idarəetməni optimallaşdırmaq və qurumda şəffaflığın təmin edilməsi məqsədilə mütəmadi olaraq monitorinqlər aparılır”.
