Qazax-Tovuz Regional Təhsil İdarəsinin tabeliyində olan təhsil müəssisələri laborant, katibə-kargüzar, uşaq birliyi təşkilatının rəhbəri (UBTR), kitabxana müdiri və kitabxanaçı axtarışındadırlar.
Gencexeber.az Qazax-Tovuz Regional Təhsil İdarəsinə istinadən məlumat verir ki, müsabiqə 3 mərhələdən (qeydiyyat, test və müsahibə) ibarətdir. İşə qəbul olmaq istəyənlər sentyabrın 26-dan oktyabrın 2-ə qədər, saat 10:00-dan 17:00-a kimi Qazax-Tovuz Regional Təhsil İdarəsinə yaxınlaşmalarıdırlar.
Laborant, katibə-kargüzar və uşaq birliyi təşkilatının rəhbəri (UBTR) vəzifələri üzrə qeydiyyat zamanı tələb olunan sənədlər:
- şəxsiyyəti təsdiq edən sənədin surəti;
- təhsil haqqında sənədin surəti.
Kitabxana müdiri və kitabxanaçı vəzifələri üzrə qeydiyyat zamanı tələb olunan sənədlər:
- şəxsiyyəti təsdiq edən sənədin surəti;
- təhsil haqqında sənədin surəti.
- əmək kitabçasının surəti.
Tələblərə uyğun namizədlər test imtahanı mərhələsinə dəvət olunacaqlar. Burada namizədlərə İKT (informasiya və kommunikasiya texnologiyaları) biliklərinin yoxlanılması və məntiq üzrə hər birinə aid 20 sual olmaqla, ümumilikdə 40 test tapşırığı, uşaq birliyi təşkilatının rəhbəri (UBTR), kitabxana müdiri və kitabxanaçı vəzifələri üzrə qeydiyyatdan keçmiş namizədlərə “Təhsil sahəsinə aid olan qulluqçu vəzifələrinin Vahid Tarif-İxtisas Sorğu Kitabçası”na müvafiq olaraq qanunvericilik üzrə 20 sual, İKT biliklərinin yoxlanılması və məntiq üzrə hər birinə aid 10 sual olmaqla, ümumilikdə 40 test tapşırığı təqdim ediləcək. Hər bölmə üzrə təqdim olunan sualların 50 faizini düzgün cavablandırmış namizədlər müsahibə mərhələsində iştirak etmək hüququ əldə edəcəklər. Müsahibə zamanı vəzifə üzrə nəzəri biliklər, şəxsi keyfiyyətlər və İKT bacarıqları yoxlanılacaq.
Vakant yerlərin siyahısı ilə linkə daxil olub tanış olmaq mümkündür.
Ünvan: Şəmkir şəhəri, Nizami küçəsi 71.
