Goranboy şəhəri və ətraf kəndlərin su təminatının yaxşılaşdırılmasına dair iclas keçirilib.
Gencexeber.az Goranboy Rayon İcra Hakimiyyətinə istinadən məlumat verir ki, Goranboy şəhərinin və ətraf kəndlərin su təminatının yaxşılaşdırılması məsələlərinə köməklik göstərilməsi üçün işgüzar iclas keçirilib. Müzakirələr və təkliflər əsasında müvafiq konseptual layihə tərtib olunub.
Bildirilib ki, Suqovuşan su anbarından qidalanan Tərtər magistral kanalının məhsuldarlığı sutkada 17 200 kub metrdir. Suqəbuledici və sutəmizləyici qurğu kompleksi inşa etməklə, Goranboy və Naftalan şəhərlərini, eləcə də Goranboy rayonunun Qızılhacılı qəsəbəsi, Əlirzalı, Xan Qərvənd, Yeniyol, Təklə, Balakürd, Boluslu, Nərimanlı, Məşədiqaralar, Zeynallı və Eyvazlılar kəndlərinin su təminatının yaxşılaşdırılması və içməli suyun əhaliyə çatdırılması hədəfə qoyulub.
Bu məqsədlə 18,6 milyon manat vəsaitin ayrılması nəzərdə tutulub. Aparılan müzakirələr nəticəsində yekun təklifləri yerli icra hakimiyyəti orqanları ilə razılaşdırmaqla, 3 ay müddətinə müvafiq Komissiyaya təqdim edilməsi qərara alınıb.
