Gəncə Dövlət Universitetinin (GDU) qarşısındakı yeraltı keçiddə uzun müddətdir işıqlandırma problemi yaşanır.
Gencexeber.az-ın məlumatına görə, "İstanbul Genetics Klinika"nın qarşısında yerləşən yeraltı keçid günün bütün saatlarında qaranlıq olur və heç vaxt işıqlar yanmır. Məsələ ilə bağlı şikayət edənlər bildirirlər ki, vəziyyət xüsusilə uşaqlar üçün təhlükə yaradır.
"Uşaqlar keçəndə qorxurlar. Böyük insan belə keçəndə adamın əti ürpəşir, qaldı ki, uşaq və gənclər. Mən gün ərzində dəfələrlə istifadə edirəm, amma işıq heç vaxt yanmır. Yaz, yay, qış - keçid həmişə qaranlıq olur," – şəhər sakini qeyd edib.
Gəncəlilər məsələ ilə bağlı aidiyyəti qurumların tədbir görməsini, keçiddə normal işıqlandırmanın bərpa olunmasını tələb edirlər.
