Dünyada 1998-ci ildən etibarən sentyabrın 22-si “Ümumdünya Avtomobilsiz Günü” kimi qeyd edilir. Bu günün təsis edilməsinin məqsədi planetin əhalisinin diqqətini alternativ nəqliyyata yönəltmək, ictimai nəqliyyatdan istifadəni artırmaq və istilik effekti yaradan qazların azaldılmasına töhfə verməkdir.
Gəncədə 49 686 avtomobilin qeydiyyatda olduğunu, beləliklə də hər yeddinci sakinin şəxsi avtomobili ilə hərəkət etdiyini nəzərə alsaq, şəhərimizdə ətraf mühitə və havanın keyfiyyətinə necə zərər vurulduğunu təxmin etmək çətin olmaz.
Bu gün Gəncə sakinləri piyada, velosiped sürərək və ya ictimai nəqliyyatdan istifadə etməklə qlobal təşəbbüsə qoşula bilərlər. Bu, yalnız küçələrdə avtomobillərin sayının azalmasına kömək etməyəcək, eyni zamanda şəhərimizin sağlamlığını və ətraf mühitini də yaxşılaşdıracaq.
Gəlin Gəncəni daha təmiz və sağlam edək!
