Gəncədə icma əsaslı məktəbəqədər təhsil proqramı start götürür.
Gencexeber.az məlumat verir ki, tədris layihəsi İcma əsaslı Uşaq Təhsil Mərkəzində oktyabrın 7-dən başlayacaq. Orada uşaqlara ətraf aləmlə tanışlıq, idman, yapma, məntiq və rəsm fənləri tədris ediləcək, eləcə də onlar müxtəlif inkişafedici oyunlara cəlb ediləcəklər.
Layihə erkən yaşda təlimin uşağın sosial-emosional, kiçik və böyük motor və intellektual bacarıqların yaxşılaşmasına müsbət təsir etməsini, onun məktəbdəki akademik göstəricilərinə və gələcəkdə əmək bazarında uğur qazanmasına zəmin yaratmasını nəzərə alaraq həyata keçirilir.
Qeydiyyat üçün (055) 711 34 33 mobil telefon nömrəsi ilə əlaqə saxlamaq lazımdır. Tədris Gəncə şəhər M.Füzuli adına 22 nömrəli tam orta məktəbin binasında aparılacaq.
Qeyd edək ki, 2017-ci ildən başlayaraq “İcma əsaslı məktəbəqədər təhsilin inkişafı” layihəsi UNICEF və Avropa İttifaqının maliyyə köməyi, Azərbaycan Respublikası Təhsil Nazirliyinin dəstəyi ilə Azərbaycan Respublikasının Təhsil İnstitutu tərəfindən icra edilir.
