Mağazada müştəri tərəfindən alınan məhsul istehlaka yararsız olub.
Bu barədə Gencexeber.az-a müraciət edən şəhər sakini “Sultan” marketdən şikayət edib. Həmin şəxs iddia edib ki, bir müddət öncə mağazadan əldə edilən “Babayevskiy” şokoladı kifli və istehlak üçün yararsız olub.
Bu məsələ ilə bağlı rəhbərliyə irad bildirən şikayətçiyə cavab olaraq söylənib ki, mağaza şokoladın keyfiyyətinə görə məsuliyyət daşımır:
“Müdiriyyətə yaxınlaşdıq ki, camaatı niyə zəhərləyirsiniz? Niyə bu cür malları satırsınız? Bizə deyildi ki, bu dükanımızın məsuliyyəti deyil. Bizə şokoladı təchizatçı bu cür gətirib”.
Şikayətçi aidiyyəti üzrə məsələnin həll edilməsi üçün müvafiq addımların atılmasını istəyib.
Məsələ ilə bağlı redaksiyamız “Sultan” marketlər şəbəkəsinin təminat-təchizat şöbəsinin rəhbəri Rəşad Ruslanoğlu ilə əlaqə saxlayıb. Onun sözlərinə görə, yararsız şokoladın müştəriyə satılması ilə bağlı hər hansısa dükana şikayət daxil olunmayıb:
“Mənə sakinlərin birindən, yaxud da Qida Təhlükəsizliyi Agentliyi tərəfindən şikayət olunmayıb. Belə bir hal baş versəydi, aidiyyəti qurum tərəfindən növbədən kənar yoxlama keçirilməlidir. Marketlərimiz şəbəkəsində istehlaka yararsız mallar satılmır. Buna müvafiq təlim keçmiş əməkdaşlarımız diqqətlə nəzarət edirlər”.
