Gəncə şəhər 38 saylı hərbi şəhərcikdə daha bir binada ilanlar müşahidə edilir.
Gencexeber.az məlumat verir ki, 389 saylı yaşayış binası sürünənlərin daimi yaşadığı məkana çevrilib. Yerli sakinlərin sözlərinə görə, ilanlar nəinki mütəmadi olaraq evin ətrafında peyda olur, həmçinin blok girişlərinə daxil olurlar, eləcə də mərtəbəarası pilləkənlərdə sürünürlər.
Bildirilib ki, dünən axşam saatlarında işdən evinə qayıdan 389 saylı bina sakinin qarşısına ilan çıxıb. Kişi dərhal evindən götürdüyü çəkiclə heyvanı öldürüb.
Sakinlər aidiyyəti qurumlar tərəfindən lazımi tədbirlərin görülməsini, həmçinin də onlara təhlükə yarada biləcək halların aradan qaldırılması istiqamətində müvafiq addımların atılmasını istəyiblər. Onlar çağırılmamış qonaqlarla qarşılaşmanın uşaqlara real təhlükə yarada biləcəyindən narahat olduqlarını bildiriblər.
Qeyd edək ki, bir müddət öncə həmin ərazidə yerləşən 338 saylı binada yaşanan oxşar vəziyyət redaksiyamız tərəfindən işıqlandırılıb. Əlaqədar qurumun əməkdaşları əraziyə baxış keçirdikdən sonra çoxmənzilli tikilidə dərmanlama tədbirləri icra ediblər.
