Gəncə şəhərində mənzillərdən birində yanğın olub.
Gencexeber.az məlumat verir ki, hadisə şəhərin Zərifə Əliyeva küçəsi, bina 6, mənzil 7 ünvanında ikimərtəbəli tikilidə baş verib.
Belə ki, ikiotaqlı mənzilin birinci otağında baş verən yanğın digər otağa da keçib. Ev sahibi mənzilində olmadığından qonşular FHN-nin Gəncə şəhər Dövlət Yanğından Mühafizə İdarəsinə bu barədə məlumat veriblər.
Çağırış ünvanına dərhal yanğından mühafizə bölmələrinin iki briqadası, eləcə də qurumun 20-ə yaxın canlı qüvvəsi cəlb olunub. Onların müdaxiləsi nəticəsində alov söndürülüb və yanğının yaxınlıqda olan tikililərə keçməsinin qarşısı alınıb.
İlkin məlumata görə, hadisəyə səbəb elektrik naqillərində baş verən qısaqapanmadır.
Faktla bağlı araşdırma başladılıb.
