Goranboyda bir sıra sakinlər susuzluqdan əziyyət çəkir.
Bizim.media-nın verdiyi məlumata əsasən, rayonunun Tatarlı kəndində su problemi yaşanır. Sakinlərin sözlərinə görə, kəndin suvarma suyu kəsilib və əkin sahələri susuzluqdan quruyub. Buna səbəb kimi Goranboy Suvarma Sistemləri İdarəsinin özbaşınalığı göstərilir. Vətəndaşlar sözügedən problemin dəfələrlə təkrarlandığını deyirlər.
“Hərəmizə məxsus 14-15 hektar meyvə bağlarımızda ağaclar susuzluqdan quruyur. Artezian quyusu yoxdur. İcra başçısı illərdir müəyyən vədlər verir, amma problem yenə də eyni... Goranboy Suvarma Sistemləri İdarəsi isə istədiyini edir. Elə ki, şikayət edirik, suyu verirlər. Səssiz qalanda, yenə su yoxdur. Mən anlamıram, təbiətin suyuna necə yiyələnmək olar?”, - deyə kənd əhalisi şikayətlənib.
Məsələ ilə bağlı Goranboy Suvarma Sistemləri İdarəsindən bildirilib ki, həmin kənddə 12 ədəd subartezian quyusu inşa edilib:
“Tatarlı kəndində ümumi 620 hektar əkin sahəsi var, orada 12 subartezian quyusu xidmət göstərir. Qaraçay çayından həmin kəndə qol ayrılır ki, bununla da təminat olunur. Əvvəlki illərdə yağıntının az olması səbəbindən Qaraçayda su olmadığı üçün quraqlıq olmuşdu. Amma bu il orada elə bir problem yoxdur, gələcəkdə belə bir problemin yaşanmaması üçün Tatarlı camaatı bizdən iki dənə subartizian quyusunun inşasını istəyir”.
