Yer kürəsindən növbəti səma hadisəsi müşahidə ediləcək.
Report-un verdiyi məlumata əsasən, oktyabrın 2-dən noyabrın 7-dək Orionid meteor yağışı olacaq. Meteorların sayı oktyabrın 21-də pik həddə çatacaq.
Mənbəyi Orion bürcündə olduğuna görə bu meteor yağışı Orionidlər adlanır. Onun zirvəsində saatda 20-yə qədər meteor görünə bilər. Ölkəmizdə yağış saat 22:00-dan 06:27-yə - səhər açılana qədər müşahidə olunacaq.
Xatırladaq ki, bu, ayın ikinci meteor yağışıdır. Drakonid meteor yağışı oktyabrın 6-10-da müşahidə ediləcək və oktyabrın 8-də pik həddinə çatacaq.
