Gəncəli idmançı Avropada birinci yer tutub. Bu haqda 24 mart tarixində Kəpəz televiziyasına istinadən məlumat veririk.
Rumıniyanın paytaxtı Buxarestdə 23 yaşadək güləşçilər arasında Avropa çempionatı keçirilib. Burada millimizin tərkibində Nizami yurdunun yetirməsi Turan Bayramov da mübarizə aparıb. 74 kiloqram çəki dərəcəsində güləşən təmsilçimiz bütün rəqiblərinə ard-arda qalib gəlib.
O, bolqarıstanlı Nikolay Dimitrovu (11:0), fransalı Maqamed Deliyevi (11:0) və rumıniyalı Kriştian Bironu (10:0) tam üstünlüklə məğlub edib. Finalda isə Turan moldovalı Vasile Diakonla qarşılaşıb. Sonuncu xal prinsipinə əsasən, 1:1 hesabı ilə rəqibinə qalib gələn Bayramov Avropa çempionu olub.
Qeyd edək ki, millimiz həm medalların əyarına, həm də xallara görə komanda hesabında birinci yeri tutub. Beləliklə, Azərbaycan yığması ardıcıl ikinci dəfə U-23 Avropa çempionatının qalibi olub.
