Gəncəli idmançı dünya çempionatında birinci yer tutub. Bu haqda 25 sentyabr tarixində Taekvondo Federasiyasına istinadən məlumat veririk.
Meksikanın Verakrus ştatında Dünya çempionatı keçirilib. Burada ölkəmizi Parataekvondo üzrə Nizami yurdunun yetirməsi İmaməddin Xəlilov (K-44) təmsil edib. O, 70 kiloqram çəki dərəcəsində mübarizə aparıb.
1/16 final mərhələsindən azad olan Xəlilov ilk döyüşündə ispaniyalı parataekvondoçu ilə üz-üzə gəlib. Həmyerlimiz dünya və Avropa çempionunu 7:3 hesabı ilə məğlub edib. Ardınca 16:2 hesabı ilə gürcüstanlı idmançını mübarizədən kənarlaşdırıb. Yarımfinalda Kuba təmsilçisi ilə döyüşüb. Görüşdə İmaməddin 12:9 hesabı ilə qələbə qazanıb.
Parataekvondoçumuzun finalda rəqibi özbəkistanlı olub. O, son qarşılaşmasında da 5:2 hesabı ilə qalib gələrək, dünya çempionu adına yiyələnib. Bununla da İmaməddin iştirak etdiyi 6 yarışda 6-cı mükafatını qazanıb.
Niderlandda Avropa Paralimpiya Oyunlarında, Cənubi Koreyada açıq Dünya Çağırış Yarışında, Meksikada Qran-pridə birinci yeri tutan təmsilçimiz Fransada açıq Avropa çempionatında ikinci, Parisdə Qran-pridə üçüncü olub.
Qeyd edək ki, Xəlilovun Dünya çempionatındakı uğuru parataekvondonun Yay Olimpiya Oyunlarına daxil edilməsindən sonra ilk qızıl medal kimi tarixə düşüb.
