Gəncəli idmançılar beynəlxalq turnirdə uğur qazanıblar. Bu haqda 12 iyul tarixində Gənclər və İdman Baş idarəsinə istinadən məlumat veririk.
Macarıstanın Kapoşvar şəhərində güləşin yunan-Roma və sərbəst növləri üzrə yeniyetmələr (U-15) arasında Avropa çempionatı keçirilib. Burada ölkəmizi təmsil edənlər arasında Cavad xan yurdunun üç yetirməsi də yer alıb. Onların nəticələri aşağıdakı kimidir:
- İsmayıl Hüseynov 52 kiloqram çəki dərəcəsində II yer (məşqçi-müəllim Məmmədov Səbuhi);
- İsa Yusibov 57 kiloqram çəki dərəcəsində II yer (məşqçi-müəllim Arzu Rəhimov);
- Həsən Həsənov 48 kiloqram çəki dərəcəsində III yer (məşqçi-müəllim Rauf Xəlilov).
Vətənə dönən idmançılar Heydər Əliyev adına Park-Kompleksdə təntənəli qarşılanıblar. Tədbirdə Gəncə-Daşkəsən Regional Gənclər və İdman İdarəsinin rəisi İntiqam Hüseynov, idman ictimaiyyətinin nümayəndələri və idman təşkilatlarının rəhbərləri iştirak edərək qaliblərə təbriklərini çatdırıb və onlara gələcək yarışlarda uğurlar arzulayıblar.
