Azərbaycanın futbol üzrə yığması UEFA Millətlər Liqasında səfərdə Estoniya millisi ilə qarşılaşıb.
Gencexeber.az məlumat verir ki, C Liqasının I qrupu çərçivəsində keçirilən oyunda yığmamız 1:3 hesabı ilə uduzub.
Tallinndə baş tutan görüşdə meydan sahibləri 32-ci dəqiqədə İoan Yakovlevin qolu sayəsində hesabı açıb. Birinci hissənin əlavə edilən dəqiqələrində Toral Bayramov penalti zərbəsini uğurla yerinə yetirərək tablodakı rəqəmləri bərabərləşdirib. Lakin, fasiləyə qədər Estoniya yenidən hesabda önə keçib: 45+2-ci dəqiqədə Vlasiy Sinyavski fərqlənib. 71-ci dəqiqədə isə Rokko Robert Şeyn komandasının üçüncü qolunu vuraraq yekun hesabı müəyyənləşdirib.
Qeyd edək ki, yığmamız Millətlər Liqasında növbəti oyununu oktyabrın 14-də Slovakiyaya qarşı keçirəcək. Tofiq Bəhramov adına Respublika stadionunda baş tutacaq matç saat 20:00-da start götürəcək.
