Xatırladaq ki, bir müddət əvvəl Təhsilin İnkişaf Fondundan bildirildi ki, oktyabrın 15-dən etibarən 11 universitetdə vahid tələbə kartı tətbiq olunacaq. Bir çoxları bunu səbrsizliklə gözləsə də, kartlar hələ də tələbələrə verilməyib.
Bəs bunun səbəbi nədir? Vahid tələbə kartlarının tətbiqi niyə gecikir?
Təhsilin İnkişafı Fondu Layihələrin idarə olunması şöbəsi İctimaiyyətlə əlaqələr üzrə aparıcı mütəxəssis Nərgiz Qədirova Bizim.Media-ya açıqlamasında bildirib ki, kartlar Bakıya gətirilib:
“Kartların üzərinə məlumatlar yapışdırılır, bütün texniki prosedurlardan mərhələli şəkildə keçir”.
Qurum rəsmisi kartların tətbiq olunacağı 2 universiteti də açıqlayıb:
"Birinci gündən etibarən bu kartlar Bakı Dövlət Universitetinin və Bakı Mühəndislik Universitetinin tələbələrinə təqdim ediləcək. Daha sonra isə növbəli şəkildə digər universitetlərə də veriləcək”.
Bəs kartlar ilk olaraq neçənci kurslara veriləcək?
"İlk olaraq üstünlük I kurs tələbələrinə veriləcək. Çünki onların təqaüd məsələləri və s var. II, III və IV kurs tələbələrinin tələbə kartları olduğu üçün, onların kartları yenisi ilə əvəz ediləcək, təqaüdlərin gecikməsi ilə bağlı problem yaşanmayacaq. Düşünürəm ki, çox qısa zamanda bu kartlar bütün universitetlərə, bakalavr, magistratura, doktorantura tələbələrinə veriləcək. Proses 1-2 həftə çəkə bilər", - deyə Nərgiz Qədirova bildirib.
Qeyd edək ki, tələbə kartları tələbələr üçün xüsusi endirimləri, müxtəlif sahələrdə onların rahat istifadəsini nəzərdə tutur. Gələcəkdə isə bu, nəqliyyat, sosial və s. kimi xidmətlərə də şamil ediləcək.
