Xəbər verdiyimiz kimi Gəncədən bir qrup şagird Fermat Beynəlxalq Riyaziyyat (FMO) yarışmasına qatılaraq turnirin Vyetnamda keçiriləcək final mərhələsinə vəsiqə qazanıb.
Həmin məktəblilər arasında şəhid Xuduş Kazımovun qızı Fatma Kazımova da var. Belə ki, Fatma sözügedən yarışda gümüş medal qazanaraq sertifikatla təltif edilib.
Gencexeber.az Fatmanın anası Əfsanə Kazımova ilə əlaqə saxlayıb, övladının qazandığı nailiyyətlə bağlı söhbət aparıb.
Şəhidin xanımı bildirdi ki, 3-cü sinifdə təhsil alan övladını xaricə göndərmək istəsə də, maddi durumu əlverişsizdir:
“Yarış Aqrar Universitetinin Ozon küçəsində yerləşən korpusunda keçirilib. Bu beynəlxalq yarış barədə bir yaxınımız məlumat verib. Mən də Fatmanın biliyinə güvəndiyim üçün istədim ki, yarışda iştirak etsin. Nəticədə qızım da uğur qazanmağı bacarıb, gümüş medal əldə edib. Bu yarışın keçirilməsinin məktəblə heç bir əlaqəsi yoxdu, “Global Olimpic Center” şirkəti tərəfindən təşkil olunub. Yoldaşım şəhid olduğu üçün övladlarımı tək böyüdürəm və maddi durumum Fatmanı Vyetnama yollamağa imkan vermir. Kömək olarsa, əlbəttə, övladımın getməsini istəyirəm. Mənim üçün böyük qürur olar ki, atasının işğaldan azad olunmuş ərazilərdə ucaltdığı bayrağı, qızım xarici ölkədə dalğalandırsın. Fatmanın özü də Vyetnama getməyə, finalda iştirak etməyə çox həvsəlidir. Amma təəssüf ki, uşaqlar bəzi incəlikləri başa düşmür”.
Əfsanə xanım bildirib ki, yoldaşı vəfat edəndə qızının 5, oğlunun isə 1 yaşı olub:
“Övladlarımız balaca olduğu üçün hansısa peşəyə yönəlmələri ilə bağlı söhbətlərimiz olmurdu. Ancaq həmişə deyərdi ki, “Allah mənə o imkanı versin ki, balalarım məndən nəsə istəyəndə ata olaraq onların qarşısında utanmayım, bütün arzularını yerinə yetirə bilim”.
Balaca qalibimiz isə redaksiyamızla sevincini bölüşərək gələcəkdə hakim olmaq istədiyini bildirib.
Qeyd edək ki, şəhid Kazımov Xuduş Həsən oğlu 8 sentyabr 1988-ci ildə Rusiya Federasiyasının Moskva şəhərində dünyaya gəlib. O, 2019-cu ilin may ayında MAXE hərbi qulluqçu kimi Azərbaycan Ordusunda xidmət etməyə başlayıb. 44 günlük Vətən müharibəsinə qatılaraq Murov Zirvəsi və Kəlbəcər rayonu istiqamətlərində gedən döyüşlərdə iştirak edib. Hərbçimiz 2 oktyabr 2020-ci ildə Kəlbəcər rayonu ərazisində şəhidlik zirvəsinə yüksəlib. Onun 110 gündən sonra tapılan nəşi 2021-ci ilin 20 yanvarında Gəncənin Şəhidlər Xiyabanında dəfn edilib.
Humay İsgəndərli
