Azərbaycan tarixində xüsusi yeri olan Dövlət Bayrağı günündə bayraq uğrunda canlarını fəda edən oğullarımızı, qəhrəmanlarımızı, minlərlə şəhidimizi rəhmətlə anırıq.
Bayrağı yox, canını fəda edənlərdən biri də Azərbaycanın Milli Qəhrəmanı Natiq Qasımovdur. Bayrağımızı erməni daşnaqları arasında məğrurcasına daşımağını əks etdirən görüntü ilə tanınıb Natiq Qasımov.
Milli Qəhrəmanımızın həyat hekayəsinə nəzər yetirək:
Natiq Səlim oğlu Qasımov 1971-ci il yanvarın 2-də Gədəbəy rayonunun Kiçik Qaramuradlı kəndində anadan olub. 1975-ci ildən ailəlikcə Mingəçevirə köçüblər. Natiq burada səkkizillik məktəbi bitirdikdən sonra qaynaqçı ixtisası üzrə peşə məktəbində təhsil alıb. Rusiyada hərbi xidməti başa vurduqdan sonra 1991-ci ildə vətənə qayıdıb, elə həmin il də könüllü olaraq cəbhəyə gedib. Ağdamda “Qarabağ şahinləri” dəstəsində ermənilərə qarşı döyüşüb.
1992-ci ildə isə 31 nəfərlik bir dəstə Ağdamın Xramort kəndi yaxınlığındakı həyati əhəmiyyəti olan bir yüksəkliyi ələ keçirmək əmrini alır. Tapşırıq yerinə yetirilir, yüksəklik ələ keçirilir, “Qarabağ şahinləri” qədim alban kilsəsində məskunlaşırlar. Kilsədə Natiq və onunla bərabər 6 nəfər qalır, yüksəklik uğrunda ölüm-dirim savaşına qalxırlar. Ermənilərin iki gün yüksəkliyi ələ keçirmək cəhdləri uğursuzluqla nəticələnir. Bütün yoldaşları həlak olan Natiq son dərəcə əlverişli strateji mövqedə yerləşən alban məbədində təkbaşına mübarizəni davam etdirir. Ermənilər onun bir neçə gün təkbaşına vuruşmasına heç cür inana bilmirmişlər.
Sonda isə düşmən tərəfindən 20 Xocalı əsirinin güllələnməsi ilə təhdid olunan Natiq bayrağımızı bağrına basıb, kilsədən çıxmışdı…
Elə o məşhur foto da həmin an çəkilib. O foto ki, Natiq Qasımovun düşmənə əyilməzliyini, qorxmazlığını və cəsarətini tam xırdalığınadək vəsf edib.
Dəfələrlə edilmiş müraciətlərə baxmayaraq, erməni tərəfi bu günədək Natiqin sonrakı taleyini Azərbaycandan və beynəlxalq təşkilatlardan gizlətməkdədir.
Mingəçevirdəki Şəhidlər Xiyabanında itkin düşənlərin rəmzi məzarları sırasında onun da adı var. Bu il isə Natiq Qasımova “Azərbaycanın Milli Qəhrəmanı” adı verilib.
