Gəncə-Daşkəsən Regional Təhsil İdarəsinin tabeliyində fəaliyyət göstərən təhsil müəssisələrində 8 Noyabr - Zəfər Günü ilə bağlı tədbirlər keçirilib.
Gencexeber.az bildirir ki, bu barədə regional təhsil idarəsi məlumat yayıb.
Belə ki, Zəfər Gününə həsr olunmuş “Dəyirmi masa”lar, “Açıq dərs”lər, foto və rəsm sərgiləri, Vətən Müharibəsi şəhidlərinin xatirəsinə həsr olunmuş ağacəkmə aksiyaları, eləcə də şagirdlərin Şəhidlər Xiyabanına səfəri təşkil olunub.
Tədbirlərdə Azərbaycanın müasir tarixində fəxarətlə, qürurla anılan Zəfər Günü barədə şagirdlərə ətraflı məlumat verilib. Ali Baş Komandan İlham Əliyevin Azərbaycan dövlətini şanlı qələbəyə aparan daxili və xarici siyasəti, Azərbaycan Ordusunun zəfər yürüşü və bununla da dünya hərb tarixindəki yeri barədə söhbət aparılıb.
Bildirilib ki, bu gün hər kəs Qarabağ savaşında vətəni üçün canından keçən şəhidlərimizin qəhrəmanlıq məktəbindən bəhrələnməli, onların həyat yolunu dərindən öyrənməlidir.
Tədbirlərdə şagirdlər Qarabağ Zəfəri, üçrəngli bayrağımız və vətənpərvərlik mövzularında şeirlər səsləndiriblər eyni zamanda ədəbi-bədii kompozisiyalar nümayiş etdiriblər.
