Gencexeber.az-ın əməkdaşı Vətən müharibəsində Şuşa əməliyyatında iştirak edən cüdo müəllimi, cüdo üzrə beynəlxalq yarışlarda Azərbaycanı təmsil etmiş qazi Ruhin Əkbərli ilə həmsöhbət olub.
Onunla müsahibəni təqdim edirik:
- Ruhin bəy, öncə özünüzü təqdim etməyinizi istəyərdim.
- Ruhin Feyyaz oğlu Əkbərli. 1996-cı ildə Gəncədə anadan olmuşam. “Tbilisi Educetion Academy”də təhsil almışam.
- Cüdo ilə tanışlığınız necə oldu?
- Cüdo idman növünə 5 yaşımdan başlamışam. İlk vaxtlar Rusiyada məşğul olmuşam. Məktəbdə idmanın təbliğatını apardıqları zaman marağım artıb. Daha sonra, bu barədə maraqlanıb, valideynlərimdən xahiş elədim ki, məni idmana aparsınlar. 9-cu sinifdə Azərbaycana gəldim. Azərbaycan yığma komandası tərkibində yarışlarda iştirak etmişəm. 2018-ə qədər. 2018-ci ildə zədəm olduğu üçün idmanı dayandırıb, müəllimlik etməyə başladım.
Amma sırf karyeramın başlanması 2012-ci illə bağlıdır. Yeniyetmələr arasında sambo üzrə açıq Avropa birinciliyində bürünc medal qazanmışam.
- Bu nailiyyətinizin arxasında hansı çətinliklər və maneələr dururdu?
- Ağır məşqlər, təlimlər. Bundan sonra, çəki salma prosesi, psixoloji hazırlıq mərhələləri. Bütün proseslər zəncirvari davam etməlidir.
- İdmandan sonra həyatınızda nələr dəyişdi?
- Hər bir professional idmançının arzusu odur ki, böyük arenalarda Azərbaycan bayrağını dalğalandırsın. Və mənim məqsədim də bu idi.
Sonradan məqsədlərim daha da genişləndi. İnsan yaşadıqca məqsədləri dəyişir. Məqsədlərinə çatdıqca daha da irəli getməyi arzulayır. Məndə də elə oldu.
- Yarışlara hazırlıq prosesi necə keçir?
- Yarışdan öncə məşq prosesləri stabil davam edir. Yarışa az vaxt qalmış məşqlər daha da ciddiləşir. Çəki aşağı salınır. Amma yarışa 2-3 gün qalmış isə bərpa müddəti olur.
- Cüdo karyeranızı bitirdikdən sonra idmanla əlaqəli hansı sahədə fəaliyyət göstərirsiniz?
- Karyeramı bitirdiyim vaxtdan bu zamana kimi Olimpiya İdman Klubunda məşqçi kimi fəaliyyət göstərirəm.
- Cüdo ilə məşğul olmaq şəxsi həyatınıza necə təsir edib?
- Cüdo bir yaşam tərzidi. Hansı ki, insan sağlamlığında, insan həyatında ağır olsa da, çox böyük müsbət tərəfləri var. İntizamlı olmaq, sağlamlığa diqqət yetirmək, fiziki hazırlıq deməkdir.
- Vətən müharibəsində iştirak etməyə necə qərar verdiniz?
- Mənim doğulduğum bölgədə döyüşlər başladıqdan sonra bu qərarı verdim. 44 günlük Vətən Müharibəsinə yola düşəndə Polad Həşimovdan sonra üzərimə borc düşdüyünü hiss edirdim.
- “Şuşa fatehi” deyirlər sizə. Bir az da döyüşlərdən danışaq. O zamanları təsvir edərdiniz.
- Bayraq qaldırmaq həmişə arzum olub. Allah qismət etdi ki, Şuşaya bayraq sancanlardan biri də mən oldum. Çağırışdan sonra N saylı hərbi hissədə bizə 1 ay təlim keçdilər. Oktyabrın 25-i bizi Füzuli istiqamətinə göndərdilər. Təzə alınmış əraziləri müdafiə edirdik. Noyabrın 3-ü isə Şuşa istiqamətinə göndərdilər. Şuşa əməliyyatı başladı. Topxana meşəsində bizi düşürdülər, ordan piyada yol qət etməli idik. Meşə ilə Daşaltına girdik. 8 saat meşə ilə yol qalxdıq. Şuşa yolunda komandir bizi 50 nəfərlik 3 qrupa böldü. Qarşıda gedən birinci qrup ermənilərlə qarşılaşdı. Atışma səslərini eşitdikdən sonra işlərimizi tezləşdirdik. Erməninin 70-80 nəfərlik heyəti var idi. Yaralı oldu, amma şükür ki, şəhid olmadı. Ermənilərin hamısını məhv etdik. 6-dan 7-ə keçən gecə artıq Şuşada idik.
- Müharibədən sonra həyatınızda hansı dəyişikliklər oldu?
- Müharibədən sonra fiziki və psixoloji baxımdan çətinliklərim çox oldu. Bu da normal hal idi. Sadəcə, heç birindən peşman deyiləm. Hər şeyin öhdəsindən gəlməyi bacardım.
- Özünüzü necə motivasiya edirdiniz?
- Müharibədə yaranan travmalarım çətinlik yaradırdı. Öz şəxsi məşqçim Araz Muxtarov bunların öhdəsindən gəlməkdə mənə çox kömək oldu. İdmançı kimi karyeramı davam etdirə bilməsəm də, məşqçi olaraq işləməyimi təklif etdi. Bu, mənə bərpa olmağımda çox müsbət təsir göstərdi. 4 ildir ki, məşqçi kimi çalışıram. Tələbələrim region, respublika və beynəlxalq arenalarda öz sözlərini deyiblər. Mən də çox şadam ki, ölkəmiz üçün öz vəzifə borcumu həm idmanda, həm də döyüşdə yerinə yetirməyi bacardım.
- Qazi olaraq, gələcək nəsillərə hansı mesajları vermək istəyirsiniz?
- Gələcək nəsil üçün mənim məsləhətim odur ki, daima xalq, dövlət üçün layiqli vətəndaş olun. İstər təhsildə, istəsə də peşələrində bu ölkə üçün çalışsınlar.
Fidan İlqar
