“Gənclər və İdman nazirliyi tərəfindən radiolarda çox maraqlı sosial çarxlar səsləndirilir. Bunu alqışlayıram. Amma Gəncləri idmanla məşğul olmağa dəvət etməklə iş bitmir. Gəncə şəhərində müasir idman zalları barmaq sayını keçmir. Aktiv üzgüçülük hovuzlarının sayı isə 1-dir”.
Azxəbər.сom xəbər verir ki, bunu Milli Məclisin plenar iclasında "Azərbaycan Respublikasının 2025-ci il dövlət büdcəsi haqqında” qanun layihəsinin müzakirəsi zamanı deputat Naqif Həmzəyev bildirib.
“Hökumət üzvlərindən eyni zamanda idman federasiyalarının rəhbərləri olmalarını nəzərə alaraq xahiş edirəm ki, regionlarda, xüsusilə də Gəncə şəhərində idmanın inkişafına köməklik göstərsinlər. Ölkə üzrə körpələr evi - uşaq bağçalarının sayı azdır. Bütün uşaqların uşaq bağçalarında tərbiyə görmələri mümkün olmur. Gəncə şəhərində 44 körpələr evi - uşaq bağçası, 45 tam orta məktəb fəaliyyət göstərir. Növbəti illərdə heç olmasa 1 məktəb və uşaq bağçasının tikilməsinə şahidlik etsək çox sevinərik. Həmçinin təklif edirəm ki, məktəbəqədər hazırlıq siniflərində təhsilə cəlb edilən uşaqlar üçün də yemək verilsin. Hətta bunun pilot layihə olaraq Gəncədən başlanması əla olardı", - deputat bildirib.
Millət vəkilinin sözlərinə görə, universitetlərdə maddi texniki baza gücləndirilir, təhsilin səviyyəsi artır, bu, sevindiricidir:
"Lakin tələbə yataqxanalarının azlığı valideynlər və tələbələr üçün müəyyən çətinliklər yaradır. Gəncə şəhərinin girişində məcburi köçkünlər üçün tikilmiş böyük şəhərcik mövcuddur. Keçmiş məcburi köçkünlər öz rayonlarına köçürüldükdən sonra bu binaların tələbələrin ixtiyarına verilməsi mümkün olacağı təqdirdə Gəncədə təhsil alan tələbələrə çox böyük dəstək vermiş olarıq. Cənab Baş Nazir xahiş edirəm bu təklifimin araşdırılmasına dair göstəriş verəsiniz".
Deputat, su problemi ilə bağlı məsələyə də diqqət çəkib:
"Gəncə şəhərində Balabağban, Böyükbağban və Totanlı adlanan ərazilərdə yağış yağan kimi evlərə gələn su istifadəyə yararsız hala düşür, su palçıqlı gəlir. Özüm də şəxsən bu hala şahidlik etmişəm. Xahiş edirəm su anbarlarının və filtrlərinin yenilənməsi, seçicilərin içməli su probleminin aradan qaldırılması üçün lazımı tədbirlərin görülməsinə dəstək olasınız".
