Xəbər verdiyimiz kimi, Gəncə şəhərində Dəmiryolçular parkı baxımsız vəziyyət idi. Redaksiyamız tərəfindən parkın istirahətə yararsız olması məsələsi işıqlandırıldıqdan sonra ərazidə təmizlik işləri görülüb.
Bu barədə Gencexeber.az-a Gəncə şəhər İcra Hakimiyyətindən məlumat verilib.
Bildirilib ki, Gəncə şəhər Mənzil Kommunal Təsərrüfatı İstehsalat Birliyinin Ərazi Xidmət Sahələri şəhərin bir sıra ərazilərində təmizlik aksiyaları həyata keçirib. Qurumun 5,12 və 13 saylı Ərazi Xidmət Sahələrinin əməkdaşları tərəfindən şəhərin Dəmir Yolu Vağzalının yaxınlığında yerləşən Dəmiryolçular parkı məişət tullantılarından, alaq otlarından və xəzəldən təmizlənib. MKTİB-nin canlı qüvvəsi və texnikası vasitəsilə yığılan tullantıların ərazidən daşınması təmin edilib. Bundan başqa, aksiya çərçivəsində parkın ərazisində yerləşən Məhəmməd Əmin Rəsulzadənin büstü və Böyük Vətən Müharibəsinin xatirə abidəsinin ətrafında səliqə-sahman yaradılıb. Ərazidə mövcud yaşıllıq zolağına aqrotexniki qulluq göstərilib, budanması təmin edilib. Məişət tullantıları üçün qoyulan konteynerlər boşaldılıb, ətrafında təmizlik işləri görülüb.
