Gəncənin Avtozavod qəsəbəsi, Elsevər Əhmədov küçəsinin sakinləri uzun müddətdir elektrik gərginliyi ilə bağlı ciddi problemlərlə üz-üzə qalıblar.
Gencexeber.az-a şikayət ünvanlayan sakinlərin sözlərinə görə, artıq iki ildir ki, evlərində işıq yox dərəcəsindədir.
"Gərginliyin aşağı olması məişət texnikalarının sıradan çıxmasına səbəb olub. Elektrik səbəbindən soyuducu, kombi, su motoru və digər avadanlıqlar sırf işləməz hala gəlib. "Qaynar xətt"ə dəfələrlə zəng etmişik, amma şikayətimizə baxan yoxdur. Axşam evlərimiz qaranlıq qalır, gündüzlər isə elektrik o qədər zəifdir ki, tozsoran belə işləyə bilmir. Onsuz da çətin dolanırıq, üstəlik bu qədər ziyana düşürük", – deyə sakinlər bildirirlər.
Əhali məsələ ilə bağlı aidiyyəti qurumlardan tədbir görülməsini və elektrik təchizatının normal vəziyyətə gətirilməsini tələb edir.
