Dekabrın 5-i “Uşaqlar və ekologiya” adlı Azərbaycan Uşaqlarının VI Ümumrespublika Forumu keçiriləcək.
Gencexeber.az Gəncə Şəhər İcra Hakimiyyətinə istinadən məlumat verir ki, forumda Nizami yurdunu Uşaq Səfirlər Məclisinin Gəncə şəhər üzrə nümayəndəsi, 27 nömrəli məktəb-lisey kompleksinin IX sinif şagirdi Hüseyn İsmayılov, Uşaq Səfirlər Məclisinin Gəncə şəhər üzrə fəallarından Gəncə şəhər 17 nömrəli məktəbin şagirdi Kənan Əliyev və Gəncə şəhər 44 nömrəli məktəb-liseyin şagirdi Aylin Kərimova təmsil edəcəklər.
Sözügedən məsələ ilə bağlı həmin məktəblilər quruma dəvət olunublar. Görüşdə şəhər rəhbərinin müavini Adil Tağıyev və Gəncə Şəhər İcra Hakimiyyəti başçısı Aparatının Hüquq şöbəsinin müdiri Xəqani Əbdüləzimov iştirak ediblər.
Şagirdlərə Azərbaycan Uşaqlarının VI Ümumrespublika Forumunun iştirak vərəqələri və yaddaş kitabçaları təqdim olunub, eyni zamanda onlar iştirak şərtləri barədə məlumatlandırılıblar.
Qeyd edək ki, ölkəmizin bütün şəhər və rayonlarından 13-17 yaş arası uşaqların iştirakı ilə baş tutacaq Forum zamanı iştirakçılar 7 mövzu üzrə qruplaşaraq müzakirələr aparacaq, onları maraqlandıran sualları dövlət rəsmilərinə ünvanlayacaq və əsaslandırılmış təkliflərlə çıxış edəcəklər.
