Gəncədə baxımsız, kimsəsiz və sosial təhlükəli vəziyyətdə olan yetkinlik yaşına çatmayanların, müəyyən yaşayış yeri olmayan 18 yaşından yuxarı şəxslərin, görmə qabiliyyəti məhdudluğu olan şəxslərin və s. sosial reabilitasiyasını həyata keçirə biləcək ixtisaslaşmış müəssisələr yoxdur.
Bu barədə məlumatı Gencexeber.az-ın sorğusuna cavab olaraq Əmək və Əhalinin Sosial Müdafiəsi Nazirliyinin Sosial Xidmətlər Agentliyinin mətbuat katibi Murad Həşimov verib.
Onun sözlərinə görə, Azərbaycanda yuxarıda sadalanan qruplardan olan insanlar üçün 2017-ci ildən fəaliyyət göstərən sığınacaq və sosial reabilitasiya müəssisəsi əslində var, lakin Bakıda yerləşir.
Paytaxtda yerləşən sığınacağa qəbul qaydalarına uyğun olaraq, şəxs müəssisəyə qəbul edilmədən öncə onun sağlamlıq vəziyyətinin ilkin tibbi müayinəsi aparılır, müvafiq səhiyyə müəsisəsi tərəfindən yoxlanılır. Həmçinin vətəndaşın yoluxucu xəstəliklərin daşıyıcısı olmaması və psixi sağlamlıq vəziyyəti barədə məlumat göstərilməklə, sağlamlıq haqqında tibbi arayış təqdim olunur.
Müəssisəyə qəbul şəxsin özünün və ya qanuni nümayəndəsinin müraciəti, həmçinin daxili işlər, yerli icra hakimiyyəti orqanlarının və bələdiyyələrin göndərişləri əsasında Agentliyin yerli qurumları və ya DOST mərkəzləri vasitəsilə aparılır.
Bildirilib ki, müəssisəyə qəbul olunanlara burada sosial-məişət, sosial-hüquqi, sosial-psixoloji və sosial-pedaqoji xidmətlər göstərilir. Mərkəzdə bu ilin yanvar-oktyabr ayları ərzində Respublikanın müxtəlif bölgələrindən 100-dən çox şəxsə xidmət göstərilib.
Amma Gəncədə analoji müəssisənin olmaması oxşar vəziyyətə düşən yerli vətəndaşlar üçün çətinlik yaradır.
Belə ki, hazırda sosial təhlükə altında olan gəncəlilər və ya ətraf rayonlardan olan vətəndaşlar yalnız Bakıya üz tuta, orada lazımi kömək və dəstəyi ala bilərlər. Gəncədə belə mərkəzlərin açılması məsələsi aktual olaraq qalır və yerli hakimiyyət orqanları ilə yanaşı, müvafiq nazirlik tərəfindən əlavə müzakirə tələb edir.
Humay İsgəndərli
