Gəncədə çaydan kişi meyiti tapılıb.
Gencexeber.az məlumat verir ki, hadisə Gəncə çayının şəhər ərazisindən keçən hissəsində, Nizami prospekti və Müseyib Bağırov küçələri yaxınlığında qeydə alınıb. Belə ki, saat 12:00 radələrində həmin ərazidən keçən piyadalar çay məcrasında insan meyitinin olduğunu müşahidə edərək polisə məlumat veriblər.
Hadisə yerinə hüquq-mühafizə orqanlarının əməkdaşları cəlb olunub. İlkin araşdırma nəticəsində məlum olub ki, meyit 62 yaşlı Gəncə şəhər sakini İkram Bayramova məxsusdur. Onun tənha yaşadığı, yaxınlıqdakı ərazidə maşınlardan parkinq pulu yığdığı və yol kənarındakı kiçik köşkdə gecələdiyi məlum olub.
İlkin ehtimala görə üz hissəsində qan izləri müşahidə olunan mərhum gecə saatlarında çay kənarındakı yüksəklikdən yıxılaraq xəsarətlər alıb və bunun nəticəsində ölüb.
Aşkar olunan meyit FHN-in xilasediciləri tərəfindən götürülərək aidiyyəti üzrə təhvil verilib. Məhkəmə Tibbi Ekspertiza və Patoloji Anatomiya Birliyinin Gəncə şəhər şöbəsinə təhvil verilən meyitlə bağlı Gəncə şəhər prokurorluğunda istintaq araşdırmalarına başlanıb.
13:17
Gəncədə kişi hündürlükdən çaya düşərək vəfat edib.
Unikal.аz məlumat verir ki, hadisə Gəncə çayının şəhər ərazisindən keçən hissəsində qeydə alınıb. Orta yaşlı kişi ehtiyatsızlıqdan hündürlük ərazidən çaya düşüb.
Xəsarət alan şəxs hadisə yerində ölüb. Əraziyə polis əməkdaşları cəlb olunub.
Ölən şəxsin kimliyi dəqiqləşdirilir.
