8 Noyabr - Zəfər Gününün dördüncü ildönümü ilə əlaqədar Gəncədə hazırlıq işləri görülür.
Gencexeber.az məlumat verir ki, Gəncə Şəhər İcra Hakimiyyətinin başçısı Niyazi Bayramov tərəfindən təsdiq olunmuş müvafiq “Tədbirlər Planı”na uyğun olaraq şəhərin bayramsayağı tərtibatı həyata keçirilir.
Gəncə şəhər Mənzil Kommunal Təsərrüfatı İstehsalat Birliyinin müvafiq şöbələri tərəfindən Şəhidlər xiyabanının ərazisində genişmiqyaslı abadlıq və təmizlik işləri görülüb, əraziyə yeni mövsümü güllər əkilib. Şəhidlər xiyabanının işıqlandırılması üçün nəzərdə tutulan plafonlardakı nasazlıqlar aradan qaldırılıb, güldanlar, işıq dirəkləri və oturacaqlar boyanıb. Həmçinin, Heydər Əliyev Park-Xiyaban Kompleksində də analoji işlər aparılıb, ərazisi bayraqlarla bəzədilib.
Bununla yanaşı, şəhərin Heydər Əliyev adına Meydanında konsert proqramı üçün nəzərdə tutulan səhnə qurulub, banerlər asılıb və bayraqlar qaldırılıb.
Xəbər verdiyimiz kimi, sabah “Zəfərin mübarək, Azərbaycan!” adlı bayram konserti keçiriləcək. Eləcə də, Quru Qoşunların N saylı hərbi hissəsinin şəxsi heyətinin yürüşü baş tutacaq.
