8 Noyabr – Zəfər Günü ilə bağlı Gəncə şəhərinin Baş meydanında Bayram konserti təşkil olunub.
Gencexeber.az-a verilən məlumata əsasən, konsert proqramı Hərbi orkestrin Azərbaycan Respublikasının Dövlət Himnini səsləndirməsi ilə başlayıb.
Konsert proqramı zamanı vurğulanıb ki, Rəşadətli Azərbaycan Ordusu cəmi 44 günə Ermənistanın illərlə formalaşdırdığı “yenilməzlik” mifologiyasını darmadağın etdi, 30 illik ağrı-acıya, nisgilə, həsrətə son qoydu. Azərbaycan xalqı məğrur, dönməz və yenilməz xalq kimi tarixə düşdü! 44 günlük Vətən Müharibəsində qazanılan şanlı qələbə və uğurla nəticələnən lokal xarakterli anti-terror əməliyyatları ilə Azərbaycanın yeni tarixi yazıldı. Bütün bunlar müasir Azərbaycan dövlətinin hərbi qüdrətinin və Azərbaycan xalqının qələbə əzminin əyani təsdiqi oldu!
Zəfərimizin 4-cü ildönümünə həsr olunmuş konsertdə müxtəlif musiqi nömrələri səsləndirilib.
Qeyd edək ki, Zəfər Bayramını və konsert proqramını izləməyə gələn Gəncə şəhər sakinləri böyük qürur və coşqu ilə bu Bayramı qeyd edir. Konsert proqramının sonunda atəşfəşanlıq olub.
