Gəncə sakini küçələrin birində çobanyastığı kollarına ziyan vurub.
Gencexeber.az məlumat verir ki, Ağamirzə Əhmədov küçəsi, 42 ünvanında şəhərin abadlıq-quruculuq qaydalarının pozulması ilə bağlı insident baş verib. Belə ki, həmin ərazidə yaşayan sakin ictimai məkanı bəzəmək üçün bir müddət öncə çobanyastığı kollarını əkib. Ərazidə yaşayan digər şəxs piyadaların hərəkətinə mane olmayan bitkiləri kökündən qoparıb, bəzilərini isə qıraraq yerə atıb.
Əraziyə 10 saylı Regional Ekologiya və Təbii Sərvətlər İdarəsinin əməkdaşları cəlb ediliblər. Araşdırma zamanı bitkiləri əkən, həmçinin hadisəni törədən şəxslərdən izahat alınıb.
Qurumdan redaksiyamıza bildirilib ki, gün ərzində çobanyastığı kollarına dəyən ziyanın qiymətləndirilməsi aparılacaq. Yoxlamanın nəticəsindən asılı olaraq, təqsirkar yaşıllıqların məhvinə və ya zədələnməsinə görə cərimələnə bilər.
Bu hal bir daha şəhər mühitində abadlıq və təbiətin mühafizəsi qaydalarına riayət olunmasına nəzarətin zəruriliyi ilə bağlı suallar doğurub.
