8 Noyabr - Zəfər Günü ilə əlaqədar olaraq Gəncənin Şəhidlər xiyabanı ziyarət edilib.
Gencexeber.az bildirir ki, bu barədə Gəncə Şəhər İcra Hakimiyyəti məlumat yayıb.
Məlumata əsasən, icra hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Gürcüstanın Gəncədəki Baş konsulu Qaxaber Abdaladze, YAP Gəncə şəhər təşkilatının sədri Bayram Aslanov, məhkəmə sədrləri, universitet rektorları, bələdiyyə sədrləri, hüquq-mühafizə orqanlarının, idarə, müəssisə, təşkilat rəhbərləri, dini konvensiyanın nümayəndələri, Gəncə Şəhər İcra Hakimiyyəti başçısı Aparatının məsul əməkdaşları, şəhid ailələri və müharibə iştirakçıları ilə birgə Gəncənin Şəhidlər Xiyabanını ziyarət ediblər.
Onlar torpaqlarımızın azadlığı uğrunda canından keçən şəhidlərimizin əziz xatirəsinə ucaldılan Əbədi Məşəl Abidəsinin önünə tər çiçəklər düzüblər. Bununla yanaşı, rəsmilər şəhid məzarlarını ziyarət edib, onların ruhunu ehtiramla yad ediblər.
Qeyd olunub ki, təsdiqlənmiş “Tədbirlər Planı”na uyğun olaraq, bu gün Gəncədə 8 Noyabr - Zəfər Günü ilə bağlı silsilə tədbirlər keçirilir.
