Son zamanlar sosial şəbəkə istifadəçiləri arasında paytaxt ərazilərdə yerləşən kirayə mənzil bazarında qiymət artımının baş verdiyi qeyd olunur. Bunu köhnə tikililərin sökülməsi, tələbələr və COP29 tədbiri ilə bağlı ölkəyə gələn turistlərin artması ilə əlaqələndirirlər.
İddiaya görə, artıq mərkəzə yaxın hissələrdə 500 manatdan ucuz birotaqlı ev tapmaq müşkülə çevrilib.
Maraqlıdır, bəs real vəziyyət necədir? Hazırda mənzil bazarında qiymət artımı varmı?
Məsələ ilə bağlı Bakuplus.аz-a açıqlama verən əmlak eksperti Elnur Fərzəliyev deyib ki, tədbirlə əlaqəli bir sıra evlərin qiymətlərində artım var:
“Daşınmaz əmlak bazarında qiymətlər stabil olaraq qalır. Sadəcə COP29 tədbiri ilə bağlı yeni tikili binalardakı kirayə mənzillərdə qiymət artımları müşahidə olunur. Təbii ki, bu qiymət artımı müvəqqəti xarakter daşıyır. Tədbir bitəndən sonra həmin mənzillərdə də qiymətlər keçmiş halına qayıdacaq.
Amma qeyd edim ki, köhnə tikili binalara tələbat çox olsa da, yeni tikili binalardakı mənzillərin qiyməti həmişə baha olub. Mənzil satış qiymətlərində də nə artım, nə də azalma var.
Sadəcə hazırda az kvadratlı, çıxarışlı mənzillərə tələbat çoxdur. Hansı ki, o evlər ipoteka predmetinə çevrilə bilən və qiyməti əlçatan olan mənzillər kimi daha çox diqqət cəlb edir. Bu tip evlərin qiymətlərində artımlar var”.
Bəs, bölgələrdə, turistik zonalarda vəziyyət necədir?
Ekspertin sözlərinə görə, turistik ərazilərdə ciddi şəkildə qiymət artımı var:
“Son 2-3 il ərzində turistik zonalarda torpaqlar və fərdi həyət evlərində ciddi şəkildə qiymət artımı müşahidə edilir. Belə hal əsasən də sırf turistlərin cəlb edildiyi ərazilərdə görülür. Təbii ki, bu yaxşı bir tendensiyadı. Çünki əvvəlki illərdə əmlak bazarında tələbat Bakı və digər böyük şəhərlərə olurdusa, hazırda vəziyyət dəyişib. Bölgələrə də ciddi maraq oyanıb, bu da qiymət artımı ilə nəticələnib.
Bölgələrdə insanlar ev tikir, torpaq və ya hazır ev alırlar. Həm özləri bağ evi kimi istifadə edir, həm də digər vaxtlarda günlük kirayə verib gəlir əldə edirlər. Yəni bölgələrdəki evlərin gəlirliliyi Bakıdakından daha çoxdur. Bölgələrdə paytaxtla müqayisədə satış qiyməti aşağıdır. Amma günlük kirayə verəndə şəhərdən daha çox qazanc gətirir”.
Fidan İlqar
