17 noyabr 1988-ci ildə Bakıda, Azadlıq meydanında Azərbaycan xalqının uzunmüddətli mitinqləri başlayıb. Bir milyona yaxın insanın qatıldığı bu aksiyalar 17 gün fasiləsiz davam edib və SSRİ-də ən kütləvi etiraz tədbirləri olub. Hökumət nümayəndələri mitinqi dayandırmağı tələb etsə də, xalq meydanı tərk etməyəcəyini bildirib.
Gencexeber.az məlumat verir ki, mitinqlərdə xalqın əsas tələblərindən biri Ermənistanın Azərbaycana qarşı təcavüzünün dayandırılması idi. Həmçinin tələblərin sırasına Dağlıq Qarabağda anti-Azərbaycan siyasəti yeridən qurumun ləğv edilməsi, əks halda Ermənistanla iqtisadi əlaqələrin kəsilməsi, SSRİ Ali Sovetinin sessiyasında Ermənistanın təcavüzü məsələsinin qaldırılması da daxil idi.
Xalqın bu qətiyyətindən öz xeyrinə istifadə etmək istəyən qüvvələr də var idi və onlar vəziyyəti qəsdən gərginləşdirir, müxtəlif təxribatlar törədirdilər. Noyabrın 22-də Gəncədə əhali ilə ordu arasında qanlı toqquşma baş verib, 160 nəfər yaralanıb, üç əsgər və bir uşaq həlak olub. Bu səbəbdən noyabrın 24-də Bakı, Gəncə və Naxçıvan şəhərlərində xüsusi vəziyyət və komendant saatı tətbiq edilib.
Bu hərəkat Azərbaycanın müstəqilliyinin bərpasında mühüm rol oynayıb. 3 ildən sonra, 1991-ci ildə Azərbaycan müstəqilliyini elan edib. 1992-ci ildə isə hərəkatın başladığı gün – 17 Noyabr – Milli Dirçəliş Günü elan edilib.
