Şəmkir rayonunun Ağlavaşlı kəndinə gedən yolun təmirə ehtiyacı var.
Gencexeber.az-a bununla bağlı şikayət daxil olub.
Bildirilib ki, çala-çuxurla dolu olan yol kəndliləri təngə gətirib. Kənd sakinlərinin sözlərinə görə, sözügedən yol sonuncu dəfə 30 il əvvəl asfaltlanıb.
“Ağlavaşlı yolu vacib yollardan biridir. Çünki bu yol Şəmkirin 5 kəndini Samux rayonuna və Gəncə şəhərinə birləşdirir. Həmin yoldan daimi olaraq istifadə edən sürücülər ayda bir neçə dəfə nəqliyyat vasitələrini usta yanına aparmaq məcburiyyətində qalırlar, çünki maşınların ehtiyat hissələri tez-tez sıradan çıxır. Problemlərdən biri də əraziyə taksi xidməti göstərən maşınların gəlməməsidir. Taksi sürücüləri yolun təmirsiz olduğunu əsas gətirərək kəndə girmirlər. Kənd əhalisi olaraq yolun tezliklə təmir olunmasını istəyirik”, - deyə müraciətdə qeyd olunub.
