Azərbaycan Ağırlıqqaldırma Federasiyasının (AAF) sabiq prezidenti Şüa Hüseynov dünyasını dəyişib.
Gencexeber.az xəbər verir ki, bu barədə AAF-nin mətbuat xidməti məlumat yayıb.
Bildirilir ki, “Tərəqqi” medalı və “Əməkdar müəllim” fəxri adına layiq görülmüş Şüa Hüseynov 1939-cu ildə Gəncədə anadan olub. Orta məktəbi və Gəncə İnşaat Texnikumunu bitirdikdən sonra Azərbaycan Dövlət Bədən Tərbiyəsi İnstitutunda (1962), Azərbaycan Dövlət Universitetinin biologiya fakültəsində (1967) təhsilini davam etdirib.
Hüseynov 1955-ci ildən idman mütəxəssisi kimi fəaliyyətə başlayıb, 15-dən çox idman ustası yetişdirib. O, 1974-cü ildə Beynəlxalq Hakim adına layiq görülüb və bir çox böyük yarışlarda, o cümlədən 1980-ci ildə XXII Yay Olimpiya Oyunlarında hakimlik edib.
Hüseynov bir idmançı kimi Gəncə şəhərinin və Azərbaycan çempionu olub, eləcə də 20-dən çox respublika rekordu təzələyib. Respublika Ağır Atletika Federasiyasının sədri işlədiyi müddətdə (1967-1995) Azərbaycan milli komandası beynəlxalq turnirlərdə mühüm uğurlar, o cümlədən dünya və Avropa çempionatlarında medallar qazanıb.
1989-cu ildə Azərbaycan Respublikasının Əməkdar Bədən Tərbiyəsi və İdman Xadimi fəxri adına layiq görülüb, 2001-ci ildə isə "Tərəqqi" medalı ilə təltif edilib. 2014-cü ildə Azərbaycan Bədən Tərbiyəsi Akademiyasının 80 illik yubileyi münasibətilə “Əməkdar Müəllim” fəxri adına layiq görülüb.
Gəncə idmançısı və pedaqoqu Şüa Hüseynov Azərbaycanda ağır atletika və idman pedaqogikasının inkişafında mühüm iz qoyub.
Allah rəhmət eləsin!
