“Xəmsə" Uşaq Rəqs Ansamblı “Azərbaycan Rəqs üzrə Çempionlar Kuboku” müsabiqəsinin qalibi olub.
Gencexeber.az bildirir ki, Suraxanıdakı S.Bəhlulzadə adına Mədəniyyət Sarayında Azərbaycan Gənclər İttifaqının, Azərbaycan Rəqs Assosiasiyasının və Azərbaycan Çerlidinq Birliyinin birgə təşkilatçılığı ilə “Azərbaycan Rəqs üzrə Çempionların Kuboku” müsabiqəsi keçirilib.
Gəncə Şəhər İcra Hakimiyyətinin dəstəyi ilə sözügedən müsabiqədə F.Əmirov adına Gəncə Dövlət Filarmoniyasının "Xəmsə" Uşaq Rəqs Ansamblı da iştirak edib. Peşəkar baletmeystr Sənan Cavadovun rəhbərlik etdiyi ansambl 7 rəqs nömrəsi ilə çıxış edərək bütün nominasiyalar üzrə qalib olaraq Azərbaycan Rəqs Kubokunu qazanıb.
Müsabiqənin yekununda Sənan Cavadovun yetirmələri medallar və sertifikatlarla təltif olunublar.
Qeyd edək ki, çempionatda mindən çox iştirakçı müxtəlif yaş qruplarında mübarizə aparıb.
