Azərbaycanın təndirçilik sənəti və çörəkbişirmə üsulu BMT-nin Elm, Təhsil və Mədəniyyət üzrə ixtisaslaşmış qurumu - UNESCO-nun qeyri-maddi irs siyahısına salınıb.
Gencexeber.az məlumat verir ki, bu barədə UNESCO üzrə Azərbaycan Milli Komissiyasının "X" səhifəsində bildirilib.
"Bu gün Paraqvayın Asunsion şəhərində keçirilən UNESCO-nun Qeyri-maddi Mədəni İrs üzrə Hökumətlərarası Komitəsinin 19-cu sessiyasında "Azərbaycanda təndir sənətkarlığı və çörək bişirmə mədəniyyəti" nominasiyası uğurla Bəşəriyyətin Qeyri-maddi Mədəni İrsinin Reprezentativ Siyahısına daxil edilib.
Bununla, Azərbaycanın UNESCO-nun qeyri-maddi mədəni irs siyahılarındakı irs nümunələrinin sayı 24-ə çatdı.
Azərbaycan xalqının zəngin mədəniyyətini və adət-ənənələrini əks etdirən bu qeyri-maddi mədəni irs nümunəsi, eyni zamanda, dünya mədəniyyətinə töhfədir. Bu nailiyyət UNESCO dəyərlərinin təbliğinə Azərbaycanın davamlı dəstəyini ifadə edir.
Bütün Azərbaycan xalqını bu uğur münasibətilə ürəkdən təbrik edirik!", - UNESCO üzrə Azərbaycan Milli Komissiyasından bildirilib.
Qeyd edək ki, Azərbaycanda çörək əsrlərdən bəri bolluq-bərəkət rəmzi sayılır. Hər bölgənin özünəməxsus çörək növü və bişirilmə üsulu olduğu kimi dadları da bir-birindən fərqlənir. Gəncə, Bakı, Naxçıvan, Şamaxı və digər yerlərdə vaxtilə geniş yayılan çörək növlərindən biri səngək çörəyidir.
Səngək çörəyi xırda daşların üzərində, qırmızı kərpicdən hazırlanan təndirlərdə bişirilir və əsasən bozbaş, piti kimi duru, yağlı yeməklər üçün nəzərdə tutulur. Onun əsas üstünlüyü 3-4 gün ərzində təzə qalması və rahat həzm olunmasıdır. Bu səbəbdən də mədə-bağırsaq xəstəliklərindən əziyyət çəkənlərə səngək çörəyindən istifadə etmək məsləhət görülür.
